O IEU na 4ª andaina “Descubrindo a Comarca de Lugo e Terras da Ulloa” (14/10/2023)
O 14 de outubro de 2023 membros do Instituto de Estudos Ulloáns participaron na cuarta xornada viaxeira “Descubrindo a Comarca de Lugo e Terras da Ulloa” correspondente ao programa Xeodestino Comarca de Lugo e Terras da Ulloa de promoción turística das comarcas de Lugo e da Ulloa, que xestiona o GDR 4 Comarca de Lugo en convenio coa Axencia de Turismo de Galicia e a colaboración dos concellos que conforman este amplo territorio, nesta ocasión co Concello de Antas de Ulla, rexido por Pilar García Porto.
Iniciouse o percorrido na Praza do Concello de Antas de Ulla, cunhas palabras dos representantes do Concello de Antas de Ulla, do GDR 4 comarca de Lugo e de Guido Guía. Continuou polas fermosas praderías e carballeiras centenarias de Vilasión e, a través de recónditos e avesedos “camiños de auga”, os 72 participantes chegaron á aldea de Castro de Amarante, antigo centro administrativo do condado de Amarante. De alí, por corredoiras cubertas de musgos e fentos (chovera a cántaros o día anterior), dirixíronse cara As Canteiras, pasando a carón do pazo de Vilane e da empresa avícola vinculada, paradigma de desenvolvemento económico sostible e de conservación do patrimonio natural e cultural.
En As Canteiras, complexo gastronómico de merecida sona, o Concello de Antas de Ulla e as entidades xestoras ofreceron aos camiñantes un saboroso aperitivo ulloán, moi abondoso, como é habitual na Ulloa. A agrupación folclórica Falcatrueiros foi a encargada de acompañar aos comensais con música tradicional galega, rematando a súa actuación coa vibrante Muiñeira de Chantada. A ocasión merecía esta enxebre despedida.
Representantes do Concello de Antas de Ulla, do GDR 4 e de Guido Guia, dirixíndose aos participantes na andaina diante da Casa do Concello de Antas de Ulla
Explicacións do guía turístico Guido Álvarez Parga na primeira parada da andaina diante do pazo de Vilasión
Intervención dos membros do IEU Jaime Ouro e Francisco Pardo na entrada do pazo de Vilasión
Intervención de Xosé Luis Santiso, directivo do IEU, nunha carballeira centenaria de Antas de Ulla
Actuación do grupo de música tradicional Falcatrueiros
Aperitivo ulloán ofrecido polas entidades organizadoras en As Canteiras ao remate da andaina